Andrea Jacobsen landsliðskona í handknattleik leikur til úrslita í þýsku bikarkeppninni í dag með liði sínu Blomberg-Lippe í Porsche-Arena í Stuttgart. Blomberg-Lippe lagði Bensheim/Auerbach í undanúrslitum í gær, 27:25.
Andstæðingur Blomberg-Lippe í úrslitaleiknum er HB Ludwigsburg sem hafði naumlega betur gegn Dortmund, 30:29, í hinni viðureign undanúrslitanna í gær.
Andrea skoraði eitt mark í undanúrslitaleiknum. Hún átti einnig eina stoðsendingu og varði eitt skot í vörninni.
Díana Dögg Magnúsdóttir lék ekki með Blomberg-Lippe í leiknum. Hún er að jafna sig eftir að hafa ristarbrotnað í leik síðla í janúar.
Tvær hafa unnið bikarinn
Tvær íslenskar handknattleikskonur hafa orðið bikarmeistarar í Þýskaland, Kristbjörg Magnúsdóttir og Sandra Erlingsdóttir.
Sandra varð bikarmeistari með TuS Metzingen á síðasta ári. Reyndar tók Sandra ekki þátt í undanúrslita- og úrslitleikjunum en var með liðinu á fyrri stigum mótsins.
Kristbjörg vann bikarinn með TuS Eintracht Minden árið 1977.
Tus Metzingen lagði Bietigheim, sem nú heitir HB Ludwigsburg, með tveggja marka mun, 30:28, í úrslitaleik í Porsche-Arena í Stuttgart
