Markvörður Stjörnunnar, Adam Thorstensen, verður við æfingar Vfl Gummersbach næstu þrjár vikur. Samhliða æfingum stendur til að Adam taki einnig þátt í æfingaleikjum liðsins. Frá þessu er sagt á heimasíðu Gummersbach í dag en sem kunnugt er Guðjón Valur Sigurðsson þjálfari Gummersbach.
Ennfremur kemur fram að Adam hlaupi í skarðið fyrir króatíska landsliðsmarkvörðinn Dominik Kuzmanović sem er með landsliðinu á Ólympíuleikunum sem hefjst í lok vikunnar. Kuzmanović samdi við Gummersbach í vor. Til viðbótar verður ungur markvörður Gummersbach fjarri næstu vikur vegna væntanlegrar þátttöku með U18 ára landsliði Þýskalands á Evrópumóti 18 ára landsliða sem hefst í Svartfjallalandi 4. ágúst.
Adam, sem á 22. ári, var einn þriggja markvarða 21 árs landsliðs Íslands sem hafnaði í þriðja sæti á heimsmeistaramótinu sem fram fór fyrir ári.
Fyrsta æfing Teits Arnar
Leikmenn Gummersbach hófu æfingar í dag að loknu sumarleyfi. Adam var ekki eina nýja íslenska andlitið á æfingu liðsins. Selfyssingurinn Teitur Örn Einarssonar var þar einnig en hann skrifaði á síðasta vetri undir tveggja ára samning við lið þessa fornfræga félags sem hefur svo sannarlega komist í fremstu röð á ný undir stjórn Guðjóns Vals síðustu fjögur ár.
Auk Kuzmanović voru Julian Köster, Tilen Kodrin, Kristjan Horžen ekki á fyrstu æfing nýs keppnisárs. Þeir eru allir að búa sig undir þátttöku á Ólympíuleikunum.
Aðrir nýir leikmenn, að Kuzmanović frátöldum voru mættir til leiks í dag, Kentin Mahé, Bertram Obling, Anel Dumić, Mykola Protsiuk og síðast en ekki síst Teitur Örn sem áður er getið.
