„Pólska liðið er sterkt en þrátt fyrir slæm úrslit í leiknum fyrir mánuði þá fundum við að við erum nær þeim en úrslitin segja til um. Við gerðum marga tæknifeila í leiknum sem auðvelt hefði verið að komast hjá auk þess sem við vorum oft manni færri. Við erum spenntar fyrir að mæta Pólverjum aftur og gera betur,“ sagði Perla Ruth Albertsdóttir landsliðskona í handknattleik í stuttu samtali við handbolta.is.
Íslenska landsliðið mætir pólska landsliðinu í vináttuleik í Lambhagahöllinni í Úlfarsárdal í kvöld kl. 20.15 og aftur á morgun í Sethöllinni á Selfossi klukkan 16. Leikirnir eru liður í undirbúningi íslenska landsliðsins fyrir Evrópumótið sem hefst eftir liðlega mánuð. Pólska landsliðið tekur einnig þátt í mótinu. Ókeypis aðgangur er á báðar viðureignir við Pólverja.
Landslið Íslands og Póllands mættust síðast á æfingamóti í Cheb í Tékklandi í síðasta mánuði. Pólverjar unnu með 11 marka mun, 26:15.
Stefnum alltaf hærra
„Það er mikilvægt fyrir okkur að fá gott lið hingað til lands til að bera okkur saman við. Segja má að pólska landsliðið sé á þeim stað sem við viljum nálgast og vera á. Við stefnum alltaf hærra. Þar á ofan er gott að fá þrjá leiki á skömmum tíma við sterkt lið í undirbúningi okkar fyrir EM. Um leið getum við séð stíganda í okkar frammistöðu og tekið mið að því við undirbúninginn síðustu vikurnar fyrir EM,“ sagði Perla Ruth Albertsdóttir landsliðskona sem eins og fleiri vonast eftir að góð mæting verði á báða leiki sem framundan eru.
