„Það er gaman að geta borið sig saman við Danina á þessum tímapunkti í móti. Danirnir eru hörkugóðir og líklegri fyrirfram en við erum einnig með frábært lið. Þess vegna segi ég bara, af hverju ekki?“ sagði Viggó Kristjánsson landsliðsmaður í handknattleik þegar handbolti.is hitti hann að máli fyrir utan hótel íslenska landsliðsins í Búdapest. Vegna hertari sóttvarnarreglna varð að halda blaðamannafund utan veggja hótelsins.
„Danir eru með mjög breiðan og góðan hóp. Sennilega geta þeir stillt upp tveimur liðum sem væru bæði í heimsklassa. Sömuleiðis erum við flottir og þess vegna erum við alls ekki hræddir við þá,“ sagði Viggó og bætti við að leikmenn íslenska landsliðsins væru fullir sjálfstrausts. Undirbúningur hafi gengið vel. Ljóst er að danska liðið er sterkara nú en þegar lið þjóðanna mættust á EM fyrir tveimur árum í leik sem íslenska landsliðið vann, 31:30. Tapið varð þess m.a. valdandi að Danir komust ekki í milliriðlakeppni mótsins. M.a. hefur örvhenta skyttan Mathias Gidsel bæst í hópinn.
„Danska landsliðið leikur ekki eins og þau lið sem við höfum mætt til þessa þótt að einhverju leyti megi líkja því við hollenska liðið. Þeir leika kannski ekki eins hratt og Hollendingarnir en þeir láta boltann vinna mjög hratt. Við verðum að vera vakandi frá fyrstu mínútu. Alls ekki má koma Dönum á bragðið,“ sagði Viggó.
Íslenska landsliðið hefur unnið þrjá fyrstu leiki sína á EM sem er nokkuð sem ekki hefur gerst áður þótt áður hafi íslenskt landslið farið taplaust upp úr riðlakeppni EM. Viggó segir stöðuna vera spennandi. Menn megi hinsvegar ekki fara framúr sér.
„Best er að taka einn leik í einu,“ sagði Viggó Kristjánsson, landsliðsmaður í handknattleik, yfirvegaður að vanda í samtali við handbolta.is í dag.
