Áfram staldra þjálfarar stutt við dhjá króatíska meistaraliðinu RK Zagreb en þjálfaraveltan er með eindæmum. Í dag var hinum gamalreynda þjálfara, Velimir Petkovic, gert að taka pokann sinn. Petkovic, sem er 68 ára gamall, var ráðinn til félagsins í byrjun nóvember.
Petkovic var 13. þjálfarinn hjá félaginu á 11 árum. Þar með er ekki öll sagan sögð í þeim efnum vegna þess að einn þeirra hefur komið og farið þrisvar á þessum 10 árum og annar komið og farið tvisvar.
Eftir jafntefli RK Zagreb við RK Nexe á dögunum þótti stjórnendum RK Zagreb sem Petkovic væri kominn á endastöð með liðið. Ekki liggur fyrir hver geti tekið við lítt öfundsverðu þjálfarastarfinu hjá Zagrebliðinu sem unnið hefur króatíska meistaratitilinn ár hvert frá 1991.
Slagsmál í búningsklefa
Á skömmum tíma hjá RK Zagreb mátti Petkovic glíma við ýmis vandamál. Það alvarlegasta var væntanlega þegar slagsmál brutust út í búningsklefa liðsins síðla í nóvember eftir leik í Nantes í Frakklandi í Meistaradeild Evrópu. Í framhaldinu var leikmaður leystur frá félaginu og annar var mánuðum saman frá keppni sökum nefbrots og annarra áverka á andliti. Þriðji leikmaðurinn var tímabundið settur í skammarkrókinn.
Meistaralið setur tvo í bann eftir slagsmál – sá þriðji er slasaður
