„Hvernig við komum inn í seinni hálfleikinn og hvernig við lékum þá er ég ánægður þótt vissulega hafi eitt og annað mátt gera betur,“ sagði Arnar Pétursson landsliðsþjálfari kvenna í handknattleik í samtali við handbolta.is í gær eftir átta marka sigur íslenska landsliðsins á landsliði Ísraels í fyrri forkeppnisleik þjóðanna í undankeppni heimsmeistaramóts kvenna, 34:26, á Ásvöllum.
Lið þjóðanna mætast aftur á Ásvöllum klukkan 15 og verður á ný ókeypis aðgangur á leikinn í boði Arion banka.
„Það hefur stundum reynst okkur erfitt að venjast því að vinna leiki þar sem við erum fyrirfram talin vera sterkara liðið. Þetta er ákveðinn þröskuldur sem við verðum að stíga yfir. Það er eitt verkefni okkar til að vinna í,“ sagði Arnar spurður um síðari leikinn eftir átta marka sigurinn. Samanlagður sigurvegari í leikjunum tveimur heldur áfram keppni og tekur þátt í umspilsleikjum sem fram fara um miðjan apríl á næsta ári.
Alvöru verkefni í dag
„Síðari leikurinn verður alvöru verkefni fyrir okkur. Innan ísraelska liðsins er að finna gæða leikmenn eins við sáum í dag. Örvhenta skyttan er til dæmis mjög góð og sú vinstra megin getur einnig verið erfið. Sóknirnar eru langar og nokkuð agaðar.
Við þurfum að skerpa á ákveðnum hlutum fyrir síðari viðureignina. Vörnin verður að vera ákveðnari, við verðum að keyra betur á þær ísraelsku og spila alvöruleik og halda áfram að vinna í okkar leik, jafnt í vörn sem sókn,“ sagði Arnar Pétursson landsliðsþjálfari í samtali við handbolta.is á Ásvöllum í gær.
