Fréttatilkynning frá Mennta- og barnamálaráðuneyti
Afreksmiðstöð Íslands (AMÍ) var formlega opnuð við hátíðlega athöfn í Laugardalshöll í gær. Ný Afreksmiðstöð er stjórnstöð afreksíþróttastarfs á Íslandi. Hún er rekin af Íþrótta- og Ólympíusambandi Íslands (ÍSÍ) og byggir á tillögum starfshóps mennta- og barnamálaráðuneytisins að fyrirkomulagi afreksstarfs á sviði íþrótta hér á landi.
Markmið AMÍ er að afreksíþróttafólk nái betri árangri í íþróttum, auk þess að efla faglega umgjörð afreksstarfs á Íslandi og þannig auka þekkingu og nýsköpun á sviði afreksíþrótta. Vésteinn Hafsteinsson afreksstjóri ÍSÍ leiddi starfshópinn sem unnið hefur að verkefninu síðastliðin tvö ár. Kristín Birna Ólafsdóttir verður nýr afreksstjóri ÍSÍ og tekur við af Vésteini, sem verður ráðgjafi í nýju Afreksmiðstöðinni.
AMÍ er afrakstur víðtæks samráðs innan íþróttahreyfingarinnar og fræðasamfélagsins undir kjörorðinu samvinna til árangurs. Áformin voru kynnt á ráðstefnunni, Vinnum gullið, í nóvember 2023 þar sem mikilvægi stuðnings, samvinnu og fjármagns var dregið fram. Tillögurnar voru kynntar á blaðamannafundi í Laugardalshöll í lok apríl 2024 og framlag til afreksíþróttastarfs stóraukið í fjárlögum 2025.
Samvinnan við sérsambönd, íþróttafélög landsins, skóla og fræðasamfélag mun halda áfram á vettvangi AMÍ þar sem okkar efnilega íþróttafólk verður í fyrsta sæti.
