Afturelding vann öruggan sigur á KA í lokaleik 14. umferðar Olísdeildar karla í handknattleik í KA-heimilinu í kvöld, 28:22, eftir að hafa verið marki yfir í hálfleik, 11:10. Afturelding lagði grunn að sigrinum með upphafskafla síðari hálfleiks þegar KA-menn komust hvorki lönd né strönd og skoruðu ekki fyrsta mark sitt fyrr en eftir nærri 13 mínútur. Afturelding hafði þá náð átta marka forskoti, 18:10.
Eftir sigurinn er Afturelding aðeins einu stigi á eftir Haukum og Val sem sitja í tveimur efstu sætum deildarinnar. KA-liðinu hefur aðeins fatast flugið og situr í 5. sæti með 16 stig, sex stigum á eftir toppliðunum.
Varnarleikur Aftureldingar var frábær frá upphafi til enda. Þegar við bættist að Einar Baldvin Baldvinsson fór á kostum í markinu og varði 19 skot þá var ekki að sökum að spyrja. Einar Baldvin var maður leiksins ásamt Færeyingnum Sveini Ólafssyni sem skoraði átta mörk og sýndi sannarlega að hann getur ekki bara leikið góðan varnarleik.
Eftir að hafa lent átta mörkum undir í síðari hálfleik náði KA-liðið að minnka muninn í fjögur mörk en var aldrei verulega nærri að ógna Mosfellingum að ráði.
Bruno Bernat markvörður og Giorgi Arvelodi Dikhaminjia voru langbestir í KA-liðinu sem olli vonbrigðum á heimavelli eftir afar góðan árangur þar á leiktíðinni.
Mörk KA: Giorgi Arvelodi Dikhaminjia 7, Einar Rafn Eiðsson 4/3, Arnór Ísak Haddsson 3, Einar Birgir Stefánsson 2, Patrekur Stefánsson 2, Logi Gautason 1, Daði Jónsson 1, Magnús Dagur Jónatansson 1, Bjarni Ófeigur Valdimarsson 1.
Varin skot: Bruno Bernat 17, 39,5% – Guðmundur Helgi Imsland 0.
Mörk Aftureldingar: Ihor Kopyshynskyi 9/5, Sveinur Olafsson 8, Kristján Ottó Hjálmsson 7, Ævar Smári Gunnarsson 2, Harri Halldórsson 1, Árni Bragi Eyjólfsson 1.
Varin skot: Einar Baldvin Baldvinsson 19/1, 50% – Sigurjón Bragi Atlason 1, 50%.
Tölfræði leiksins hjá HBStatz.
Staðan og næstu leikir í Olísdeildum.
