Eftir fund Aganefnd HSÍ lögðust nefndarmenn undir feld vegna tveggja mála sem bárust inn á borð nefndarinnar og nefndarmenn telja nauðsynlegt að skoða ofan í kjölinn áður en úrskurður verður felldur.
Annarsvegar er um að ræða mál Harðar Flóka Ólafssonar starfsmanns Þórs sem hlaut útilokun með skýrslu vegna „mjög grófrar ódrengilegrar hegðunar“ í leik Þórs og Fram U í Grill 66 deild karla sem fram fór á Dalvík á síðasta laugardag.
Hinsvegar er erindi sem barst nefndinni frá framkvæmdastjóra HSÍ vegna leikbrota Úlfs Gunnars Kjartanssonar, í leik KA og ÍR í Olís deild karla 6. október sl.
Í fundargerð aganefndar frá fundi í dag segir að bæði atvik verðskuldi lengra bann en einn leik. Þess vegna ætla nefndarmenn að íhuga bæði mál betur áður en úrskurður verður felldur. „Mun aganefnd tilkynna skrifstofu HSÍ um málið, sbr. 1. mgr. 3. gr. reglugerðar HSÍ um agamál.“
Afgreiðslu málanna var þess vegna frestað um sólarhring með hliðsjón af 3. gr. reglugerðar HSÍ um agamál, segir í fyrrgreindri fundargerð aganefnd á vef HSÍ í kvöld.
Ísak Óli í bann en ekki Vekic
Ísak Óli Eggertsson leikmaður KA U hlaut útilokun með skýrslu vegna mjög grófrar ódrengilegrar hegðunar í leik HK og KA U í Grill66 deild karla í Kórnum á föstudaginn og var úrskurðaður í eins leiks bann á fundi aganefndar í dag.
Josip Vekic, leikmaður Þórs, sem einnig hlaut útilokun með skýrslu vegna grófs leikbrots í leik Þórs og Fram U á laugardaginn, slapp við bann þar sem brot hans var metið falla undir reglu 8:5 b). Aganefnd minnir Vekic á stighækkandi áhrifum útlokana vegna slíkra brota.
