Ágúst Ingi Óskarsson tryggði Aftureldingu nauman sigur á ÍR, 37:36, í Skógarseli í kvöld í viðureign liðanna í fjórðu umferð Olísdeildar karla í handknattleik. Sigurmarkið skoraði Ágúst Ingi þegar tvær sekúndur voru til leiksloka. Nokkrum sekúndum áður hafði Jökull Blöndal jafnað metin fyrir ÍR sem var átta mörkum undir rétt fyrir lok fyrri hálfleiks.
Afturelding er þar með áfram ósigruð í efsta sæti Olísdeildar með átta stig. ÍR hefur eitt stig og var grátlega nærri öðru stigi að þessu sinni.
Staðan var 21:15 fyrir Aftureldingu þegar fyrr hálfleikur var að baki.
ÍR-ingar hertu upp hugann í síðari hálfleik og sýndu mikinn karakter að vinna upp forskot Aftureldingar í æði skrautlegri viðureign. Mikið var um brottrekstra í síðari hálfleik og tvisvar kom fyrir að Afturelding var með þrjá menn í kælingu.
ÍR vann upp forskotið jafnt og þétt og komst yfir í fyrsta og eina sinn í leiknum, 33:32, þegar sex mínútur voru til leiksloka. Aftureldingarliðinu lánaðist að komast yfir á ný og vinna síðan ævintýralegan sigur á síðustu sekúndu.
Mörk ÍR: Bernard Kristján Owusu Darkoh 10, Jökull Blöndal Björnsson 9, Baldur Fritz Bjarnason 6/4, Eyþór Ari Waage 5, Óðinn Freyr Heiðmarsson 3, Elvar Otri Hjálmarsson 2, Patrekur Smári Arnarsson 1.
Varin skot: Ólafur Rafn Gíslason 8, 20% – Gísli Hrafn Valsson 0.
Mörk Aftureldingar: Ihor Kopyshynskyi 9, Árni Bragi Eyjólfsson 7/5, Kristján Ottó Hjálmsson 6, Ágúst Ingi Óskarsson 4, Oscar Lykke 4, Harri Halldórsson 4, Ævar Smári Gunnarsson 2, Þorvaldur Tryggvason 1.
Varin skot: Sigurjón Bragi Atlason 14, 29,2%.
Tölfræði leiksins hjá HBStatz.
Staðan og næstu leikir í Olísdeildum.
