Aldís Ásta Heimisdóttir og liðsfélagar í Skara HF urðu í kvöld deildarmeistarar í sænsku úrvalsdeildinni í handknattleik. Skara HF vann Skuru, 28:22, í lokaumferðinni á heimavelli. Á sama tíma náðu IK Sävehof aðeins jafntefli á heimavelli gegn Kungälvs, 23:23. Skara HF og Sävehof enduðu jöfn að stigum en Skara hreppti efsta sætið á innbyrðis úrslitum.
Aldís Ásta, sem hefur leikið með Skara í þrjú ár og gengið í gegnum súrt og sætt með liðinu á þeim tíma, skoraði þrjú mörk í leiknum í kvöld og gaf eina stoðsendingu.
Deildarmeistaratitillinn er sögulegur fyrir Skara-liðið sem aldrei hefur náð svo langt áður í úrvalsdeildinni. Liðið vann 13 af síðustu 14 leikjum sínum í deildinni.
Skara mætir Kristianstad í átta liða úrslitum sem hefjast á mánudaginn.
Jóhanna skoraði fimm mörk
Jóhanna Margrét Sigurðardóttir skoraði fimm mörk og átti fjórar stoðsendingar þegar Kristianstad gerði jafntefli á heimavelli gegn Höörs HK H 65, 27:27. Berta Rut Harðardóttir skoraði ekki fyrir Kristianstad að þessu sinni. Jóhanna Margrét var valin maður leiksins.
Lokastaðan:
