„Það hefur aldrei verið sterka hlið þeirra sem stjórna að taka tillit til leikmanna,“ segir Arnór Atlason, aðstoðarþjálfari íslenska karlalandsliðsins í handknattleik, um þá ákvörðun stjórnenda Evrópumótsins í handknattleik að krefjast þess að leikmenn og þjálfarar mættu í keppnishöllina í Herning klukkan 10 í morgun og ræða við fjölmiðla.
Þungt í mönnum
Hálfur sólarhringur er liðinn síðan undanúrslitaleik Íslendinga og Dana lauk og flestir hafa náð örfáum klukkustundum í svefn. Skiljanlega er þungt í forráðamönnum íslenska landsliðsins vegna þessa skipulags en stjórnendum mótsins hefði verið í lofa lagið að boða til fjölmiðlahittinga síðar í dag.
Sofna ekki á stundinni
„Það hefði verið auðvelt að taka tillit til leikmanna sem leika klukkan 20.30 að staðartíma og voru að koma á hótel upp úr miðnætti. Flestir þeirra sem hafa staðið í þessu vita að menn leggjast þá ekki beint á koddann og sofna eins og kornabarn. Auk þess eiga flestir eftir að hitta sjúkraþjálfara eftir leikina, borða og fleira,“ sagði Arnór.
Gerum gott úr þessu
„Hér erum við og gerum gott úr þessu og tökum svo til við undirbúning næstu 24 klukkustundir,“ sagði Arnór Atlason aðstoðarþjálfari karlalandsliðsins í viðtali við handbolta.is í Jyske Bank Boxen í Herning í morgun.
