Alexander Peterson hefur verið ráðinn aðstoðarþjálfari karlalandsliðs Lettlands í handknattleik. Tilkynnt var um ráðningu Alexanders í morgun samhliða því að Margot Valkovskis tók að sér að vera aðalþjálfari landsliðsins. Andris Molotanovs verður þriðja hjólið í þjálfarateyminu sem markvarðaþjálfari.
Þetta verður fyrsta stóra starf Alexanders í þjálfun en hann er þrautreyndur handknattleiksmaður og landsliðsmaður Íslands og einn silfurdrengjanna frá Beijing 2008.
Alexander er fæddur í Lettlandi en kom til hingað til lands seint á tíunda áratug síðustu aldar. Þá hafði hann leikið bæði með yngri og eldri landsliðum Lettlands.
Alexander lagði keppnisskóna endanlega á hilluna í vor eftir langan og afar farsælan feril með Gróttu/KR, Val og Düsseldorf, Füchse Berlin, Rhein-Neckar Löwen og MT Melsungen auk 186 landsleikja fyrir Ísland á árinum 2004–2021 sem hann skoraði í 725 mörk. Alexander var kjörinn Íþróttamaður ársins á Íslandi 2010.
Valkovskis landsliðsþjálfari hefur árum saman búið í Þýskalandi og er um þessar mundir þjálfari yngri liða HSC 2000 Coburg. Tveir synir hans leika með þýska félaginu auk þess að hafa átt sæti í A-landsliðinu.
Fyrsta verkefni Alexanders, Valkovskis og Molotanovs verður þátttaka landsliðs Lettlands í forkeppni HM 2027 gegn Lúxemborg í byrjun nóvember. Báðir leikir verða háðir í Lúxemborg.
