Alfreð heiðraður í Þýskalandi – Ólafur vitnaði í Hávamál

Alfreð Gíslason, landsliðsþjálfari Þýskalands í handknattleik karla var heiðraður í gærkvöld þegar viðurkenningar á Die German Handball Awards 2021 fóru fram en þá var lýst niðurstöðu í kjöri í ýmsum flokkum á handknattleiksfólki sem skaraði fram úr á síðasta ári. Alfreð hlaut nafnbótina handboltapersóna ársins, Handball-Persönlichkeit.

Við útnefninguna, sem fram fór á netinu að þessu sinni, ávarpaði Ólafur Stefánsson sinn gamla læriföður. Þakkaði hann Alfreð kærlega fyrir liðna tíð og fyrir að hafa átt þátt í koma sér úr því að vera góður handboltamaður upp í að verða mjög góður. Ólafur lauk stuttu ávarpi sínu með því að vitna í Hávamál.

Deyr fé,
deyja frændur,
deyr sjálfur ið sama.
En orðstír
deyr aldregi
hveim er sér góðan getur.

Rak umsjónarmann útsendingar í vörðurnar við ávarp Ólafs enda sagðist hann ekkert kunna í íslensku.

Hægt er að sjá útsendinguna neðst í frétt handball-world. Ávarp Ólafs hefst á um 42. mínútu. Eftir það tekur við stutt viðtal við Alfreð.