„Það er ekki alveg komið á hreint ennþá hvað ég geri á næsta keppnistímabili. Ég er í sambandi við nokkur lið,“ sagði færeyski handknattleiksmaðurinn Allan Norðberg við handbolta.is en hann tilkynnti í gær að hann hafi leikið sinn síðasta leik með KA. Fimm ára dvöl hjá Akureyrarfélaginu væri lokið.
Allan, sem er 29 ára gamall, er annar færeyski handknattleiksmaðurinn sem kveður KA eftir keppnistímabilið. Handbolti.is sagði frá því gær að markvörðurinn Nicholas Satchwell hafi þegar samið til tveggja ára við nýliða norsku úrvalsdeildarinnar, Viking TIF frá Björgvin.
Allan hefur verið ein kjölfesta KA-liðsins undanfarin ár og ýmist leikið í hægra horni eða í skyttustöðunni hægra megin, allt eftir því hvað hefur þurft hverju sinni. Allan kom til KA 2018 frá StÍF í Skála á Austurey. Hann var í færeyska landsliðinu sem á dögunum tryggði sér í fyrsta skipti sæti í lokakeppni Evrópumótsins í Þýskalandi.
