Allar tillögur til breytinga á keppni á Íslandsmótinu í handknattleik á næsta keppnistímabili voru felldar á ársþingi Handknattleikssambands Íslands sem haldið var fyrri partinn í dag í Laugardalshöll. M.a. lá fyrir tillaga um eina deild í meistaraflokki kvenna. Tillagan sú var samþykkt en ekki með nægilega afgerandi hætti til þess að ganga í gegn, en 2/3 atkvæða þarf til lagabreytinga.
Einnig kom fram tillaga um að fjölga liðum í Olísdeild kvenna úr átta liðum í 10 sem féll í grýttan jarðveg. Hugmynd um að fella niður undanúrslit í Grill 66-deild karla fór ekki í gegn. Sömu sögu er að segja að tillögu um að eitt lið félli beint úr Olísdeild karla og liðið í næst neðsta sæti léki umspilsleiki við næst efsta lið Grill 66-deildar karla.
Tveir þriðju er sjálfsaflafé
Velta HSÍ hefur aldrei verið meiri en á síðasta ári eða 411 milljónir króna. Nokkur afgangur varð af rekstrinum. Um tveir þriðju tekna HSÍ á síðasta rekstrarári var sjálfsaflafé, einn þriðji í gegnum ÍSÍ frá afrekssjóði og Lottó.
Nánar verður sagt frá helstu niðurstöðum þingsins á handbolti.is í kvöld.
