Handknattleiksþjálfarinn Slavko Helgi Bambir lést í Zagreb í Króatíu 13. júní eftir veikindi á 84. aldursári.
Bambir, eins og hann var yfirleitt kallaður af mörgum vinum sínum hér á landi, fæddist í Čitluk í Bosníu og Herzegóvínu 1. september 1939. Hann flutti hingað til lands árið 1988 og þjálfaði íslenska kvennalandsliðið í þrjú ár. Einnig þjálfaði Bambir m.a. hjá Víkingi, FH og KR.
Bambir bjó á Íslandi í um tvo áratugi og fékk íslenskan ríkisborgararétt. Hann tók þá upp nafnið Helgi.
Bambir var menntaður dýralæknir og vann um langt árabil við tilraunastöð Háskóla Íslands í meinafræði á Keldum. Sérgrein hans voru fisksjúkdómar.
Á yngri árum lék Bambir handknattleik og var m.a. leikmaður GRK Zagreb sem varð júgóslavneskur meistari 1962, 1963 og 1965 og silfurhafi 1964. Bambir átti sæti í landsliði Júgóslavíu á árunum 1961 til 1967. Einnig lék hann í Austurríki frá 1972 til 1977 og var handknattleiksþjálfari í Slóveníu og í Króatíu frá 1978 til 1987.
Samhliða þjálfun ytra sinnti hann kennslu og rannsóknum sem prófessor við háskóla í Zagreb tengda menntun sinni sem dýralæknir.
Eftir að Króatía varð sjálfstætt ríki árið 1991 var Bambir um skeið fulltrúi hins nýja lýðveldis hér á landi og víða.
Bambir lætur eftir sig eiginkonu, tvær dætur og barnabörn.
