Örn Ingi Bjarkason og Andrés Gunnlaugsson hafa verið ráðnir þjálfarar kvennaliðs Aftureldingar til næstu tveggja ára. Þeir taka við þjálfun liðsins af Jóni Brynjari Björnssyni sem sagði starfi sínu lausu í síðasta mánuði vegna flutninga til Svíþjóðar. Afturelding staðfesti ráðningu Andrésar og Arnar í kvöld.
Örn Ingi var aðstoðarþjálfari liðsins á síðustu leiktíð en stígur nú upp í stærra hlutverk í nýju teymi með hinum reynslumikla Andrési, sem kemur frá Berserkjum og Víkingi.
„Ég er þakklátur stjórninni fyrir að hafa fengið svona reynslumikinn þjálfara eins og Andrés til liðs við okkur en hann mun hjálpa okkar unga hóp að verða ennþá betri. Þetta verður spennandi og skemmtilegur vetur,” segir Örn í tilkynningu Aftureldingar í kvöld.
„Ég er mjög ánægður að vera kominn til starfa hjá Aftureldingu og hlakka til að vinna með Erni Inga, liðinu og stjórn,“ er haft eftir Andrési í sömu tilkynningu.
Grill 66-deildir – fréttasíða.
