Handknattleiksmennirnir Andri Fannar Elísson og Ágúst Ingi Óskarsson hafa skrifað undir samninga þess efnis að þeir leiki með Gróttu á næsta keppnistímabili í Olísdeild karla og í Poweradebikarnum. Frá þessu segir í tilkynningu handknattleiksdeildar Gróttu í dag. Leið þeirra á Seltjarnanes liggur frá Ásvöllum í Hafnarfirði en báðir voru leikmenn Hauka á síðasta keppnistímabili. Haukar lána Andra Fannar til Gróttu í eitt ár.
Andri Fannar er hægri hornamaður sem leikið hefur upp yngri flokka Hauka og verið með annan fótinn í meistaraflokksliðinu auk fasts sætis í U-liðinu í Grill 66-deildinni. Andri Fannar hefur jafnframt leikið með yngri landsliðum Íslands og fór m.a. í morgun til Færeyja með U19 ára landsliðinu til tveggja leikja sem eru liður í undirbúningi landsliðsins fyrir þátttöku á heimsmeistaramótinu sem hefst í Króatíu 2. ágúst.
Næst markahæstur
Ágúst Ingi kemur einnig til Gróttu frá Haukum hvar hann hefur verið undangengið ár. Hann er 22 ára gamall og leikur helst í stöðu vinstri skyttu. Ágúst Ingi varð næst markahæsti leikmaður Grill 66-deildar karla á síðustu leiktíð með 111 mörk fyrir U-lið Hauka.
Áður en Ágúst Ingi gekk til liðs við Hauka fyrir ári var hann eitt tímabil með Neistanum í Þórshöfn í Færeyjum. Rætur Ágústs Inga liggja í HK.
Nokkrar breytingar
Nokkrar breytingar verða hjá Gróttu fyrir komandi keppnistímabil. Auk komu Andra Fannars og Ágúst Inga þá liggur fyrir að Akimasa Abe, Andri Þór Helgason, Birgir Steinn Jónsson og Daníel Andri Valtýsson hafa snúið sér til annarra handknattleiksliða auk þess sem Þorgeir Bjarki Davíðsson er hættur handknattleik.
