„Ég veit ekki. Ég ætla að sjá til,“ sagði Andri Snær Stefánsson þjálfari handknattleiksliðs KA/Þórs við handbolta.is í gær þegar hann var spurður hvort hann ætli sér að halda áfram þjálfun liðsins á næsta keppnistímabili.
Andri Snær tók við þjálfun KA/Þórs fyrir þremur árum og stýrði liðinu til þrefalds sigurs 2021. KA/Þór varð þá Íslands-, bikar-, og deildarmeistari í fyrsta sinn auk þess að vinna meistarakeppni HSÍ haustið 2020.
Nægur efniviður
Undanfarið ár hefur KA/Þórsliðið gengið í gegnum miklar breytingar. Reyndir leikmenn hafa róið á önnur mið, lagt skóna á hilluna eða eru í barnsburðarleyfi. Þess utan var liðsstyrkur sóttur út fyrir landsteinanna.
Leikmannahópurinn er þar af leiðandi nokkuð ólíkur þeim sem var ósigrandi fyrir tveimur árum. Efniviðurinn er hinsvegar nægur og með þolinmæði og áframhaldandi vinnu getur KA/Þór komist í allra fremstu röð innan fárra ára.
Veturinn var púsluspil
„Við höfum farið í gegnum mjög áhugavert ár fyrir norðan með miklum mannabreytingum. Þess utan hafa meiðsli sett strik í reikninginn. Veturinn hefur farið í mikið púsluspil hjá mér og Örnu Valgerði Erlingsdóttur ásamt mörgum ungum og efnilegum leikmönnum sem eru að stíga sín fyrstu skref. Vinnan hefur verið skemmtileg.
Næst á dagskrá er að fara vel yfir tímabilið, hvað gekk vel og hvað miður. Í framhaldinu tökum við ákvörðun um næstu skref,“ sagði Andri Snær Stefánsson þjálfari KA/Þórs í samtali við handbolta.is.
