Andstæðingur Vals í úrslitaleikjum Evrópubikarkeppninnar í handknattleik kvenna, Conservas Orbe Zendal BM Porriño, sparaði kraftana og tapaði með 11 marka mun í gærkvöld þegar liðið sótti BM Elche heima á Alicante í fyrri viðureign liðanna í átta liða úrslitum spænsku úrvalsdeildarinnar.
Eftir jafnan fyrri hálfleik datt botninn úr leik Conservas Orbe Zendal BM Porriño með þeim afleiðingum að liðið tapaði með 11 marka mun, 32:21. Staðan í hálfleik var 11:9, BM Elche í vil. Ljóst er að BM Porriño þarf að eiga stórleik til þess að komast í undanúrslit.
BM Porriño hafnaði í fjórða sæti spænsku 1. deildarinnar en BM Elche í fimmta sæti. Síðarnefnda liðið er lék við KA/Þór og síðar ÍBV í Evrópubikarkeppninni fyrir nokkrum árum.
Mica Casasola, leikmaður BM Porriño, tók ekki þátt í leiknum í gærkvöld. Ekki kemur fram í umfjöllun um leikinn hvort hún verður klár í slaginn gegn Val.
Conservas Orbe Zendal Bm Porriño er með bækistöðvar í bænum Porriño skammt frá Vigo í suðvestur-Galisíu, rétt norður af landamærum Spánar og Portúgal.
Fara út í dag
Valsliðið fer til Spánar í dag. Með í för eru um 70 stuðningsmenn. Fyrri úrslitaleikur Vals og BM Porriño í Evrópubikarkeppni kvenna fer fram á laugardaginn og hefst klukkan 15. Leikurinn verður sendur út á RÚV.
Síðari úrslitaleikurinn verður í N1-höllinni á Hlíðarenda laugardaginn 17. maí og hefst klukkan 15. – Miðasala
Stefnir í að uppselt verði á úrslitaleik Vals á Spáni – nærri 2.000 miðar seldir
