Annað EM í röð verður Ísland í riðli með Ungverjalandi

Íslenska landsliðið verður með Ungverjalandi, Póllandi og Ítalíu í F-riðli Evrópumóts karla í handknattleik sem fram fer í Danmörku, Noregi og Svíþjóð frá 15. janúar til 1. febrúar á næsta ári. Dregið var síðdegis í leikhúsinu í Herning á Jótlandi.

Leikir í riðli Íslands fara fram í Kristianstad 16., 18. og 20. janúar. Tvö lið komast áfram í milliriðla sem leiknir verða í Malmö 23., 25. 27. og 28. janúar. Tvö efstu lið D- og E-riðls taka einnig sæti í þeim milliriðli.

16. janúar: Ísland - Ítalía.
18. janúar: Ungverjaland - Ísland.
20. janúar: Pólland - Ísland.

Aftur í Kristianstad

Ungverjar var sá andstæðingur sem íslenska liðið fékk úr efsta styrkleikaflokki. Lið þjóðanna mætast þar með á ný í Kristianstad en þau leiddu saman hesta sína í eftirminnilegum leik á sama stað á HM 2023. Viðureignin sú endaði ekki vel fyrir íslenska liðið á endasprettinum.

Landslið Íslands og Ungverjalands voru einnig saman í riðli á EM 2024 í Þýskalandi. Ungverjar unnu viðureignina örugglega, 33:25, sem fram fór í München.

Ítalía í fyrsta sinn

Pólverjar drógust í riðil Íslands úr þriðja styrkleikaflokki og Ítalía úr fjórða flokknum. Þetta verður í fyrsta sinn sem Ísland og Ítalía mætast í lokakeppni á stórmóti. Ítalska landsliðið verður nú með á EM í fyrsta sinn frá 1998.

Miðasala á EM.

Íslendingar verða í L, K og J svæðum í Kristianstad Arena.

Riðalskipting og leikstaðir: