Handknattleiksdeild KA hefur borist góður liðsstyrkur en Ari Valur Atlason hefur skrifað undir eins og hálfs árs samning við félagið.
Ari Valur, sem er tvítug vinstri skytta mætir norður frá FH og ÍH. Ari Valur er þó KA-maður í húð og hár en hann hóf yngriflokkaferilinn hjá KA áður en hann hélt suður en faðir hans er Atli Sveinn Þórarinsson knattspyrnumaður hjá KA og fleiri félögum. Atli sneri einnig heim til KA á dögunum er hann tók við sem afreksþjálfari knattspyrnudeildar KA.
„Ari Valur er afar spennandi leikmaður sem er bæði öflugur í vörn og sókn. Undanfarin tvö ár hefur hann barist við erfið meiðsli en hefur sýnt mikinn karakter við að koma sér aftur af krafti inn á völlinn og gerði meðal annars 51 mark í 13 leikjum með liði ÍH í vetur,“ segir m.a. í tilkynningu KA.
