„Aron verður með í Evrópuleik okkar á laugardaginn,“ sagði Sigursteinn Arndal þjálfari karlaliðs FH í handknattleik spurður hvort Aron Pálmarsson verði með FH-liðinu gegn Partizan frá Serbíu í fyrri viðureign liðanna í 32-liða úrslitum Evrópubikarkeppninnar í Kaplakrika á laugardaginn klukkan 18.30.
Aron hefur verið frá keppni síðustu vikur vegna meiðsla í baki og hefur til að mynda ekki verið í leikmannahópi FH í tveimur síðustu leikjum í Olísdeildinni, gegn HK í gærkvöld og Fram í vikunni á undan.
„Við settum upp áætlun um að hann geti æft með okkur þegar líður á þessa viku til þess að verða klár í leikinn á laugardaginn,“ sagði Sigursteinn ennfremur.
Gekk illa að fá botn í meiðslin
„Um var að ræða smávægileg meiðsli í baki sem fyrst og fremst gekk illa að fá greiningu á. Eftir ítarlega skoðun hjá læknum þá fékkst botn í málið. Í framhaldinu tók við lyfjakúr sem er að ljúka og Aron er að verða heill heilsu aftur,“ sagði Sigursteinn.
Stórviðburður á laugardaginn
„Við erum bara fullir tilhlökkunar fyrir leiknum á laugardaginn. Partizan liðið er mjög sterkt. Ég hef í fórum mínum upptökur af nokkru leikjum liðsins sem ég hef farið vel yfir,“ sagði Sigursteinn og bætti við að auðveldara hafi verið að afla sér upplýsingar um Partizanliðið en það gríska sem FH lagði í fyrstu umferð keppninnar í síðasta mánuði.
Öllu verður tjaldað til
Öllu verður tjaldað til í Kaplakrika á laugardaginn enda um stórviðburð að ræða. FH-ingar hafa sýnt það margoft að þeim er einkar lagið að slá upp stórveislu utan vallar sem innan í Kaplakrika þegar stórleikir eru þar á dagskrá. Engin undantekning verður á að þessu sinni enda um að ræða 99. leik meistaraflokksliðs FH í Evrópukeppni.
Öll í Krikann!
„Ég vil hvetja alla FH-inga og allt handboltaáhugafólk til þess að fjölmenna í Krikann á laugardaginn og taka þátt í handboltaveislu með okkur. Það kostar sitt að taka þátt svo það munar um allan stuðning. Menn hafa verið duglegir hér í Krikanum að búa til flottan viðburð. Víst er að ekki verður slegið slöku við á laugardaginn,“ sagði Sigursteinn Arndal þjálfari FH.
Sem fyrr segir þá hefst viðureign FH og RK Partizan klukkan 18.30 á laugardaginn í Kaplakrika. Síðari viðureignin verður viku síðar í höfuðborg Serbíu.
