Örvhenta skyttan Ásta Björt Júlíusdóttir hefur skrifað undir samning um áframhaldandi veru hjá ÍBV næsta árið, hið minnsta. Frá þessu sagði ÍBV í gær. Ásta Björt hefur leikið með ÍBV um árabil og verið ein af traustari leikmönnum liðsins með þeirri undantekningu að leiktíðina 2021/2022 lék hún með Haukum.
Að loknu fæðingarorlofi frá handknattleik mætti Ásta Björt á ný til leiks með ÍBV þegar komið var inn á síðustu leiktíð og tók þátt í 14 leikjum í Olísdeildinni og skoraði 18 mörk.
„Ásta Björt er mikilvægur hlekkur í liðinu – bæði innan vallar sem og utan. Með krafti sínum, leikskilningi og baráttu er hún mikilvæg fyrirmynd fyrir yngri leikmenn félagsins.
Við hlökkum til að sjá Ástu Björt á komandi tímabili og erum sannfærð um að hún eigi eftir að láta til sín taka enn frekar,“ segir m.a. í tilkynningu ÍBV í gær.
