Tasos Kampouris-keppnishöllinni í Chalkida þar sem íslenska landsliðið mætir gríska landsliðinu í undankeppni EM karla í handknattleik hefur lifað sitt fegursta skeið. Á það ekki síst við búningsklefana sem lítt hefur verið haldið við, svo ekki sé dýpra í árinni tekið. Ljóst er að Grikkir hafa fengið afslátt á alþjóðlegum stöðlum þegar kemur að búningsklefum.
Helst ekki tefla við páfann
Búningsklefi íslenska landsliðsins í keppnishöllinni er með lakara móti. Þrjá gamlar og úr sér gengnar sturtur, tvö salerni sem illa er séð að teflt sé við páfann, alltént að salernispappir sé notaður í lok skákar, flagnandi málning og ryðgaðar röralagnir. Sápa og handþurrkur eða handklæði eru vægt til orða tekið af skornum skammti. Ofan á annað mætti meiri natni vera lögð við þrif.
Telja má fullvíst að keppnishöllin og búningsklefarnir séu á undanþágu hjá Handknattleikssambandi Evrópu, EHF, ef marka má kröfurnar sem rétt hafa sloppið til þess að undanþága hefur fengist til alþjóðlegrar keppni í handknattleik í Laugardalshöll.
Tíðindamaður handbolta.is í Chalkida rak nefið inn í búningsklefann meðan íslenska landsliðið æfði í keppnishöllinni síðdegis í dag og smellti af nokkrum myndum.
