Ekkert lát er á sigurgöngu Óðins Þórs Ríkharðssonar og liðsfélaga í Kadetten Schaffhausen í svissnesku A-deildinni í handknattleik. Þeir unnu í dag sinn 18. leik í deildinni og fara þar með taplausir á tímabilinu í jólaleyfi. Kadetten vann liðið sem situr í öðru sæti, Pfadi Winterthur, 29:27, að viðstöddum 1.914 áhorfendum í Winterthur eftir að hafa verið marki yfir í hálfleik.
Óðinn Þór var að vanda öflugur í leiknum. Hann skoraði 9 mörk í 11 skotum, fjögur markanna skoraði hann úr vítaköstum.
Kadetten fer með 11 stiga forskot inn í síðari hluta deildarkeppninnar sem hefst í byrjun febrúar, að loknu Evrópumótinu í handknattleik karla. Oft hafa yfirburðir liðsins verið miklir í efstu deildinni í Sviss en sjaldan eins og um þessar mundir.
Óðinn Þór er næstmarkahæstur í deildinni með 137 mörk í 18 leikjum. Hann er marki á eftir Ante Gadza, leikmanni Wacker Thun.
