U18 ára landslið kvenna í handknattleik varð í áttunda sæti á Opna Evrópumótinu sem staðið hefur yfir síðan á mánudaginn í Gautaborg. Íslenska liðið tapaði fyrir norska landsliðinu, 25:21, í viðureign um 7. sæti sem lauk í hádeginu. Um leið missti íslenska liðið af sæti á Ólympíuhátíð Evrópuæskunnar í Maribor í Slóveníu sem fram fer að ári liðnu. Sjö efstu lið Opna Evrópumótsins tryggja sér sæti á Ólympíuhátíðinni.
Leikur íslenska og norska liðsins einkenndist af miklum sveiflum. Norsku stúlkurnar byrjuðu betur og skoruðu þrjú fyrstu mörkin. Íslensku stúlkurnar unnu sig inn í leikinn með mikilli baráttu og komust yfir í fyrsta sinn, 10:9. Áfram héldu þær að spila frábæra vörn og voru með þriggja marka forskot í hálfleik, 13:10.
Fyrsta mark síðari hálfleiks var íslenskt og forskotið komið í fjögur mörk. Norsku stúlkurnar höfðu ekki lagt árar bát. Þær sneru heldur betur við taflinu, jöfnuðu metin og réðu lögum og lofum síðustu mínúturnar.
Mörk Íslands: Laufey Helga Óskarsdóttir 6, Agnes Lilja Styrmisdóttir 4, Ebba Guðríður Ægisdóttir 4, Eva Steinsen Jónsdóttir 3, Roksana Jaros 2, Tinna Ósk Gunnarsdóttir 2.
Í markinu varð Arna Sif Jónsdóttir 11 skot.
Alls tóku 20 landslið þátt í Opna Evrópmótinu.
Úrslitaleikirnir:
5. sætið: Svíþjóð – Spánn 20:19.
3. sætið: Ungverjaland – Frakkland 30:12.
1. sætið: Sviss – Þýskaland 34:31, eftir framlengingu.
