„Á köflum var þetta ágætur leikur en það er einnig ljóst að bæði lið eiga eftir að verða betri þegar á tímabilið líður. Margir leikmenn beggja liða eru meiddir og voru ekki með að þessu sinni,“ sagði Ágúst Þór Jóhannsson þjálfari Vals við handbolta.is í gær eftir sigur Vals á ÍBV í Meistarakeppni HSÍ í kvennaflokki, 30:23, í Origohöll Valsara.
Tveir línumenn í miðri vörninni
Valur hóf leikinn illa og lenti m.a. 0:4 undir og 4:8. Þegar á leið hertu leikmenn upp hugann. Ágúst sagði varnarleikinn hafa verið máttlítinn framan af.
„Okkur tókst að þétta varnarleikinn þegar á leikinn leið. Sara Sif varði einnig vel. Um leið fengum við góð hraðaupphlaup sem skiluðu mörkum.
Eftir að Mariam meiddist þá erum við með tvo línumenn í miðri vörninni sem kallar á breyttar áherslur þegar vörn er snúið í sókn. Við eigum eftir að slípa það betur saman,“ sagði Ágúst sem útilokar ekki að Anna Úrsúla Guðmundsdóttir leiki eitthvað áfram með Val á komandi leiktíð í Olísdeildinni.
Vonar að Anna hjálpi til
„Anna hefur æft með okkur og er í gríðarlega góðu formi. Hún er frábær leikmaður eins og allir vita. Ég vonast til að hún hjálpi okkur í vetur,“ sagði Ágúst Þór Jóhannsson þjálfari Vals við handbolta.is.
