„Maður er ekkert að vinna, það er bara handbolti,“ segir Katrín Anna Ásmundsdóttir leikmaður 20 ára landsliðs kvenna og Gróttu en hún er að taka þátt í sínu fjórða sumarverkefni með yngri landsliðum Íslands. Katrín Anna er ein nokkurra í 20 ára landsliðshópnum á HM sem var með þegar hópurinn lék í B-hluta Evróupumótsins sumarið 2021 í Litáen. Síðan hefur íslenska liðinu jafnt og þétt vaxið fiskur um hrygg með þeim öflugu leikmönnum sem landsliðið skipa.
Katrín Anna og félagar í landsliðinu ljúka keppni á HM á morgun sunnudag með leik við Sviss um 7. sætið. Viðureignin hefst klukkan átta heima á Íslandi, tíu að staðaríma.
Katrín Anna segir að þegar heim verður komið taki við vinna og smá frí frá handbolta áður en undirbúningur hefst með nýliðum Gróttu fyrir keppni í Olísdeildinni en liðið vann sér sæti í deildinni í vor eftir sigur á Aftureldingu í umspili um sætið.
„Við eigum það inni að vinna leikinn við Sviss á morgun sem verður síðasti leikurinn okkar saman. Ég er viss um að við munum halda sambandi í framtíðinni þegar þessu lýkur,“ sagði Katrín Anna Ásmundsdóttir sem fékk tækifæri á síðustu leiktíð til þess að æfa með A-landsliðinu og hver veit hvað framtíðin ber í skauti sér hjá henni og öðrum leikmönnum 20 ára landsliðs kvenna.
Lengra myndskeiðsviðtal við Katrínu Önnu er efst í þessari frétt.
Handbolti.is er í Skopje og ætlar að fylgjast með síðasta leik íslenska liðsins á mótinu eins og öðrum fram til þessa. Viðureign Íslands og Sviss um 7. sæti hefst klukkan 8 í fyrramálið. Textalýsing verður frá leiknum auk þess sem hlekkur verður á streymi frá viðureigninni sem fram fer Boris Trajkovski Sports Center, þjóðarhöll Norður Makedóníu.
HMU20: Dagskrá og úrslit síðustu leikdagana
