„Við sýndum ótrúlega sterkan karakter í síðari hálfleik,“ sagði Sandra Erlingsdóttir sem stýrði sóknarleik íslenska landsliðsins í handknattleik af miklum myndugleika í sigrinum á Færeyingum í Þórshöfn í dag, 28:23, en leikurinn var liður í undankeppni Evrópumótsins. Íslenska liðið hefur nú fjögur stig eftir tvær viðureignir.
„Maður sá baráttuviljann skína af öllum í síðari hálfleik. Það small einhvernveginn allt hjá okkur. Okkur tókst að spila inn á veikleika færeyska liðsins eins og lagt var upp með,“ sagði Sandra ennfremur. Hún var eins og aðrar þakklát fyrir stuðninginn sem liðið fékk frá stuðningsmannahópnum sem slóst með í för til Þórshafnar.
Gefur mikið extra
„Það gaf svo ótrúlega mikið extra að fá fólk svona með okkur. Þessi stuðningur skiptir meira máli en margir halda,“ sagði Sandra Erlingsdóttir landsliðskona í handknattleik.
