Viktor Lekve þjálfari færeyska úrvalsdeildarliðsins KÍF í Kollafirði hefur krækt í tvo leikmenn til þess að styrkja leikmannahóp sinn. Annar þeirra er Benedikt Emil Aðalsteinsson, tvítugur piltur sem leikið hefur með Víkingi í Grill 66-deildinni við góðan orðstír. Hinn nýliðinn í herbúðum KÍF er Færeyingurinn Jens Paula Poulsen. Hann ákvað að söðla um eftir nokkur ár hjá Team Klaksvik.
Í tilkynningu KÍF segir að tilgangurinn með liðsaukanum sé að styrkja jafnt varnar- og sóknarleik liðsins sem annars er að mestu byggt upp á ungum leikmönnum. Auk þess er Tórur Joensen frá keppni vegna slitins krossbands.
Viktor tók við þjálfun KÍF í sumar eftir að hafa unnið hjá KA í tvö ár. Liðið er í fimmta sæti í sjö liða úrvalsdeild með fjögur stig að loknum fjórum leikjum.
