Handknattleiksmaðurinn Bergvin Þór Gíslason hefur ákveðið að rifa seglin og hætta að mestu í handknattleik. Í svari við skilaboðum til handbolta.is segir Bergvin Þór ekki útiloka að hann verði með í einhverjum leikjum Þórs á komandi keppnistímabili, þá viðureignum á útivelli en Bergvin Þór er búsettur á höfuðborgarsvæðinu. Þór leikur í Grill 66-deildinni á næstu leiktíð.
Bergvin Þór er Þórsari að upplagi og lék með yngri flokkum félagsins og síðar með sameiginlegu liði Þórs og KA, Akureyri handboltafélagi. Sumarið 2017 gekk Bergvin Þór til liðs við ÍR. Eftir þriggja ára veru hjá ÍR-ingum skipti hann yfir til Aftureldingar og varð m.a. bikarmeistari með liði Mosfellinga 2023.
Meiðsli hafa sett strik í reikning Bergvins Þórs síðustu árin og því hefur hann e.t.v. ekki verið jafn áberandi með liði Aftureldingar og ella. Hann lék til að mynda 15 leiki af 22 í Olísdeildinni á síðasta keppnistímabili. Bergvin Þór lék meira sem varnarmaður á síðustu árum en sóknarmaður þrátt fyrir að hafa verið afbragðsskytta á yngri árum.
Vorið 2013 var Bergvin Þór valinn efnilegasti leikmaður Olísdeildar karla.
