Bernard Kristján Owusu Darkoh hefur framlengt samningi sínum við handknattleiksdeild ÍR til ársins 2028. Fylgir hann m.a. í fótspor Jökuls Blöndal Björnssonar en tilkynnt var um áframhaldandi veru hans hjá ÍR á sunnudaginn.
Bernard Kristján er fæddur árið 2007. Hann hefur verið í lykilhlutverki í meistaraflokki ÍR undanfarin tvö tímabil. Bernard Kristján skoraði meðal annars 138 mörk í 22 leikjum í Olís-deildinni í fyrra og 38 mörk á yfirstandandi leiktíð. Hann leikur í stöðu hægri skyttu.
Bernard Kristján hefur einnig átt sæti í yngri landsliðum Íslands og var í 18 ára landsliðinu sem hafnaði í fjórða sæti á EM sumarið 2024. Hann er í æfingahóp 20 ára landsliðsins sem valinn var um helgina og mætir grænlenska A-landsliðinu um næst helgi í tveimur leikjum hér á landi.
„Við ÍR-ingar erum himinlifandi með framlengingu Bernards sem er mikilvægur liður í okkar áframhaldandi uppbyggingu. Það verður spennandi að fylgjast með Bernardi á heimaslóðum næstu árin,“ segir m.a. í tilkynningu ÍR í morgun.
