0
„Þetta var gríðarlega skemmtilegur leikur, andinn og stemningin inni á vellinum var flott. Okkur tókst að stilla vel saman strengina. Mér finnst þetta vera einn besti leikur sem við höfum spilað um langt skeið,“ sagði Thea Imani Sturludóttir landsliðskona í handknattleik í samtali við handbolta.is eftir sigur landsliðsins á Pólverjum, 30:24, í fyrri vináttulandsleiknum í Lambhagahöllinni í Úlfarsárdal í kvöld.
„Okkur tókst að halda tæknifeilum í lágmarki enda vissum við það að pólska liðið væri mjög gott í að refsa fyrir hver mistök,“ sagði Thea Imani ennfremur en hún tók þátt í leiknum við Pólverja fyrir mánuði sem tapaðist með 11 marka mun, 26:15. Þá moraði leikur íslenska liðsins í mistökum sem kostuðu mörg pólsk hraðaupphlaup. Nú var annað upp á teningnum.
„Það gekk allt upp í sókninni. Eins var vörnin mjög góð og markvarslan.“
Komum okkur ekki á óvart
Spurð hvort þær hafi komið sjálfum sér á óvart með frammistöðunni hló Thea og svaraði að bragði:
„Ég held að við höfum ekki komið okkur á óvart því við vitum vel hvað við getum gert þegar tekst að stilla saman strengina. Það var bara ógeðslega gaman að geta sýnt fólkinu hér heima hvað í okkur býr,“ sagði Thea Imani sem sagði stemninguna hafa verið frábæra á meðal áhorfenda. Allt hafi lagst á eitt að gera kvöldið sem skemmtilegast.
Lengra myndskeiðsviðtal er við Theu Imani efst í greininni.
Sjá einnig:
Vorum við ákveðnar í að sýna á okkur rétta andlit
Stórbrotin frammistaða þegar Pólverjar voru grátt leiknir – myndir
Skulduðum frammistöðu gegn pólska liðinu
