Landsliðsmaðurinn í handknattleik, Bjarki Már Elísson, gekkst í gær undir aðgerð á vinstra hné hér á landi vegna meiðsla sem hrjáðu hann allt síðastliðið keppnistímabil. Félagslið Bjarka, ungverska meistaraliðið Telekom Veszprém, segir frá þessu á Instagram síðu sinni og birtir með mynd af Bjarka Má hvar hann liggur í sjúkrarúmi með reifað vinstra hné.
Ennfremur segir í tilkynningunni að endurhæfing taki nokkurn tíma. Hugsanlega væri von á hornamanninum slynga aftur út á leikvöllinn í lok september, gangi allt að óskum.
Með „jumpers knee“
Bjarki Már var greindur með svo kallað „jumpers knee“ sem tengist patella-sininni framan á hnénu. Segja má að meiðsli af þessum toga séu af stofni álagsmeiðsla. Fram kemur í tilkynningu Telekom Veszprém Bjarki Már hafi oft verið þjáður vegna meiðslanna á leiktíðinni. Ekki hafi verið lengur mögulegt að komast hjá aðgerð.
