Björg Elín Guðmundsdóttir sjálfboðaliði hjá Val og HSÍ til áratuga var í kvöld útnefnd eldhugi ársins af Íþrótta- og Ólympíusambandi Íslands. Íþrótta- og Ólympíusamband Íslands (ÍSÍ), í samvinnu við Lottó, stendur fyrir kjöri á Íþróttaeldhuga ársins en hann er valinn úr röðum sjálfboðaliða í íþróttahreyfingunni, sem hafa í gegnum árin nýtt eigin hæfileika, frítíma og sérþekkingu til að efla íþróttastarfið í sínu nærumhverfi eða á landinu öllu.
Björg Elín sú fyrsta úr röðum handknattleikshreyfingarinnar sem hreppir þessa nafnbót.
Kallað var eftir tilnefningum úr hreyfingunni og frá landsmönnum. Bárust alls 353 tilnefningar um alls 176 einstaklinga úr 24 íþróttagreinum.
Björg Elín hefur verið í kringum handknattleik frá því hún var barn. Hún æfði og spilaði handbolta með Val og aðstoðaði einnig við þjálfun um tíma. Þegar leikmannaferlinum lauk, bauð hún fram krafta sína sem sjálfboðaliði. Hún tók stóran þátt í starfi HSÍ, sat í stjórn, var í landsliðsnefndum og var liðstjóri.
Hjá Val gegndi hún svipuðum störfum en hefur meira og minna verið liðstjóri meistaraflokks kvenna hjá Val frá árinu 1999, þó með nokkrum hléum. Hún er einstaklega fórnfús, umhyggjusöm og metnaðargjörn fyrir hönd sinna liða og leggur allt í verkefnin sem hún tekur sér fyrir hendur. Hennar sjálfboðaliðaferill spannar rúmlega 40 ár, Björg verður 75 ára á þessu ári og starfar enn sem liðstjóri hjá kvennaliði Vals í handbolta, segir m.a. í kynningu á Björgu Elínu á vef ÍSÍ.
Kallað var eftir tilnefningum úr hreyfingunni og frá landsmönnum og bárust alls 353 tilnefningar um alls 176 einstaklinga úr 24 íþróttagreinum. Úr röðum þeirra hefur sérstök valnefnd valið þrjá einstaklinga og mun einn þeirra hljóta heiðursviðurkenninguna Íþróttaeldhugi ársins 2024, segir á vef ÍSÍ.
