Daði er kominn í raðir KA-liðsins á nýjan leik

Handknattleiksmaðurinn Daði Jónsson hefur gengið á ný til liðs við KA eftir tveggja ára veru í Danmörku. Frá þessu er sagt á heimasíðu KA. Daði sem verður 26 ára síðar á árinu er uppalinn hjá KA. Hann var um tíma fyrirliði áður en hann söðlaði um og fór til Danmerkur.

Daði steig sín fyrstu skref í meistaraflokki með sameiginlegu liði Akureyrar Handboltafélags tímabilið 2016-2017. Eftir að KA tók upp þráðinn undir eigin merki á nýjan leik var Daði einn þeirra sem tók þátt í að mynda kapplið félagsins í Olísdeildinni.

Daði, sem er sagður fyrst og fremst vera öflugur varnarmaður, hefur leikið 87 leiki fyrir KA í deild og bikar og ætti hann því að rjúfa 100 leikja múrinn í vetur haldi hann vel á spilunum.