Fjórðu umferð Olísdeildar karla í handknattleik lýkur í kvöld með viðureign Stjörnunnar og Hauka í TM-höllinni í Garðabæ. Flautað verður til leiks klukkan 19.30. Liðin eru á líkum stað í deildinni.
Stjörnumenn hafa fram til þessa fengið að kynnast öllum úrslitum sem eru í boði, bragðað á öllum molum í konfektkassanum. Þeir unnu FH í fyrstu umferð, gerðu síðan jafntefli við Fram í annarri umferð, í eina heimaleiknum til þessa, áður en þeir máttu bíta súra eplið að tapa með minnsta mun í heimsókn til Gróttumanna í Hertzhöllina, 29:28.
Haukar lögðu KA á sannfærandi hátt í fyrstu umferð á heimavelli áður en þeir biðu óvænt lægri hlut í heimsókn til nýliða ÍR í jómfrúarferð í Skógarselið. Í síðustu viku lentu Haukar í kröppum dansi en stóðu hann af sér áður en yfir lauk þegar Selfoss liðið kom í heimsókn á Ásvelli.
Auk leiksins í Olísdeildinni verða fjórir leikir í Grill66-deild karla, annarri umferð. Viðureign Fjölnis og ungmennaliðs Hauka var frestað en í staðinn þá var leik Kórdrengja og Þórs frá Akureyri bætt á dagskrá á nýjum heimavelli Kórdrengja, Ásvöllum í Hafnarfirði. Upphaflega stóð til að Þórsarar kæmu þangað á sunnudaginn.
Olísdeild karla, 4. umferð:
TM-höllin: Stjarnan – Haukar, kl. 19.30 – sýndur á Stöð2sport.
Staðan í Olísdeild karla.
Grill66-deild karla, 2. umferð:
Origohöllin: Valur U – Víkingur, kl. 19.30.
Sethöllin: Selfoss U – KA U, kl. 20.
Úlfarsárdalur: Fram U – HK, kl. 20.
Ásvellir: Kórdrengir – Þór Ak, kl. 20.30.
Staðan í Grill66-deild karla.
