Mikil eftirvænting ríkir á meðal stuðningsmanna Aftureldingar og Stjörnunnar vegna oddaleiks liðanna í átta liða úrslitum Olísdeildar karla í handknattleik sem fram fer í kvöld að Varmá. Upphafsmerki verður gefið á slaginu klukkan 19.40.
Tveir fyrstu leikirnir hafa verið afar jafnir og spennandi á lokamínútunum. Stjarnan var hársbreidd frá því að jafna metin á síðustu sekúndum í fyrsta leiknum að Varmá. Það tókst ekki og Afturelding vann, 29:28.
Í öðrum leik liðanna sem fram fór í Hekluhöllinni í Garðabæ á laugardaginn var Afturelding með boltann á síðustu sekúndum og átti þess kost að jafna. Ekki lánaðist Mosfellingum að gera sér mat úr síðustu sókn sinni. Stjarnan vann boltann og Pétur Árni Hauksson skoraði 27. mark Stjörnunnar, 27:25, á síðustu andartökum viðureignarinnar.
Sigurlið leiksins í kvöld mætir Val í undanúrslitum.
Allar forsendur eru fyrir að oddaleikurinn verði jafn og taugatrekkjandi fyrir alla. Mikið verður um dýrðir að Varmá í tilefni leiksins. Veitingasala hefst klukkan 18. Miðasala er á Stubb sem mörgum er orðinn að góðu kunnur.
Leikur kvöldsins
Olísdeild karla, 8-liða úrslit, oddaleikur:
Varmá: Afturelding – Stjarnan (1:1), kl. 19.30.
- Þeir sem ekki komast á leikinn geta fylgst með útsendingu á Handboltapassanum.
