Dagur Sigurðsson, þjálfari Króatíu, segir veikleika að finna innan íslenska landsliðsins. Liðin mætast í fyrsta leik í milliriðli 2 á Evrópumóti karla klukkan 14:30 í Malmö í dag.
„Á heildina litið þurfum við að bæta okkur í hverjum einasta þætti leiksins. Frá markvörðum til varnarmanna, hraðaupphlaupin og hvernig við snúum úr vörn í sókn og öfugt. Aðal áherslan er því á að vera einbeittari og agaðri. Það er mikilvægast fyrir leikinn gegn Íslandi,“ hefur Handball World eftir Degi.
Einn íslenskur sigur í sjö leikjum við Króata
Króatía er án stiga í milliriðlinum en Ísland tók með sér tvö stig með því að fá fullt hús stiga í F-riðli. Króatía hafnaði í öðru sæti á HM 2025 og sló Ísland úr keppni í því móti með stórsigri.
Skyndilega voru þeir úr leik
„Ísland er með eitt besta liðið í keppninni en þeir eru ekki án sinna vandamála. Já, þeir tóku með sér stig í milliriðilinn og eru í betri stöðu en við sjáum það í keppninni að staðan getur breyst mjög fljótlega.
Þeir vita það líka frá síðasta ári að þeir voru í góðri stöðu. Ég held að þeir hafi verið búnir að vinna fjóra af fimm leikjum á síðasta ári og skyndilega voru þeir úr leik.
Liðið er í góðu formi en þeir misstu mikilvægan leikmann, Elvar Örn Jónsson, í síðasta leik. Sjáum til hvernig þeir breyta leikskipulagi sínu eftir þann missi. Það er stórt spurningarmerki,“ sagði Dagur einnig.
