Daníel Berg verður Stefáni til halds og trausts

Daníel Berg Grétarsson hefur skrifað undir þriggja ára samning við handknattleiksdeild Aftureldingar. Hann mun vera aðstoðarþjálfari meistaraflokks karla ásamt því að sjá um U-Lið og þriðja flokk félagsins. Daníel Berg mun þar með vinna þétt með Stefáni Árnasyni sem tók nýverið við þjálfun meistaraflokks af Gunnari Magnússyni.

Daníel Berg þjálfaði fjórða flokk karla hjá Aftureldingu sem varð bæði deildar- og Íslandsmeistari á þessu tímabili.

Daníel Berg lék um skeið með Aftureldingu fyrir nokkrum árum. Hann hefur víða komið við sem leikmaður og síðar þjálfari.

„Stjórn handknattleiksdeildar er gríðarlega ánægð með það starf sem Daníel hefur nú þegar unnið og bindur miklar vonir við þessa ráðningu,“ segir í tilkynningu Aftureldingar.