Í framhaldi af öruggum sigri Dana á Norðmönnum í síðasta leik milliriðils eitt í kvöld liggur fyrir að íslenska landsliðið leikur við Dani í undanúrslitum Evrópumótsins í Jyske Bank Boxen í Herning á Jótlandi á föstudaginn. Leikurinn hefst klukkan 19.30 að íslenskum tíma. Í hinni viðureign undanúrslita eigast við Króatía og Þýskaland, með þjálfarana Dag Sigurðsson og Alfreð Gíslason. Sú viðureign hefst klukkan 16.45.
Úrslitaleikir á sunndaginn
Sigurlið undanúrslita eigast við í úrslitaleik sem hefst klukkan 17 á sunnudaginn. Bronsviðureignin verður flautuð á klukkan 14.15.
Ekki síðan 2002
Ísland og Danmörk hafa ekki mæst í leik um sæti á stórmóti í handknattleik karla síðan í bronsleiknum á EM 2002 í Globen í Stokkhólmi. Danir unnu öruggan sigur, 29:22.
Kjöldrógu Norðmenn
Danir kjöldrógu Norðmenn í leiknum í Herning í kvöld, ekki síst í síðari hálfleik sem var einstefna af hálfu danska landsliðsins. Eftir þriggja marka forskot, 19:16, í hálfleik fengu Norðmenn ekki við neitt ráðið í síðari hálfleik. Danir unnu með 14 marka mun, 38:24.
Svíar lögðu Sviss, 34:21, í síðasta leik milliriðils tvö í Malmö Arena, 34:21. Sænska liðið átti þriðja sæti riðilsins víst fyrir leikinn. Svíar mæta Portúgölum í leiknum um 5. sætið í Jyske Bank Boxen í Herning á föstudaginn kl. 14.
