Áfram heldur Giorgi Dikhaminjia, leikmaður KA, að gera það gott með landsliði Georgíu í undirbúningi fyrir Evrópumótið í handknattleik. Dikhaminjia þótti skara fram úr í liði Georgíu í dag þegar liðið sigraði landslið Kúveit, 28:24, í vináttulandsleik sem fram fór í Slóveníu. Aron Kristjánsson er landsliðsþjálfari Kúveit. Hann er að búa Kúveita undir Asíumótið sem hefst upp úr miðjum mánuði í Kúveit.
Dikhaminjia var markahæsti leikmaður landsliðs Georgíu í dag með átta mörk. Örvhenta stórskyttan Giorgi Tskhovrebadze var næstur á eftir með sex mörk.
Georgíumenn eiga einn leik eftir áður en þeir fara til Svíþjóðar þar sem þátttaka í Evrópumótinu bíður. Þeir mæta Alsír á morgun, eftir því sem næst verður komist.
EM karla 2026 – leikdagar, leikstaðir, leiktímar
Dikhaminjia skoraði 15 mörk í sigurleik Georgíu á landsliði í Sádi Arabíu á milli jóla og nýárs.
