Kristján Örn Kristjánsson, Donni, og liðsfélagar í Skanderborg unnu Ribe-Esbjerg, 34:30, í viðureign liðanna í 5. umferð dönsku úrvalsdeildarinnar í handknattleik í dag. Leikið var í Esbjerg. Donni skoraði sjö mörk í 12 skotum og var næst markahæstur. Hann átti einnig tvær stoðsendingar og var tvisvar vikið af leikvelli í tvær mínútur í hvort skipti.
Elvar Ásgeirsson skoraði eitt mark fyrir Ribe-Esbjerg í tveimur tilraunum. Elvar gaf tvær stoðsendingar en komst hjá því að vera vikið af leikvelli.
Skanderborg er í öðru sæti úrvalsdeildar með átta stig eftir fimm viðureignir. Ribe-Esbjerg situr í 10. sæti mrð þrjú stig.
Sjö íslensk mörk í Thy Arena
TMS Ringsted er á sömu slóðum og Ribe-Esbjerg í dönsku úrvalsdeildinni eftir tap fyrir Mors-Thy, 33:30, á Jótlandi í dag.
Guðmundur Bragi Ástþórsson skoraði fimm mörk, þar af tvö úr vítaköstum fyrir Ringsted. Einnig átti Hafnfirðingurinn þrjár stoðsendingar.
Ísak Gústafsson skoraði tvö mörk fyrir Ringsted auk tveggja stoðsendinga.
Stöðuna í dönsku úrvalsdeildinni og í fleiri deildum evrópsks handknattleiks er að finna hér.
