Kristján Örn Kristjánsson, Donni, og liðsfélagar í Skanderborg AGF hleyptu aukinni spennu í toppbaráttu dönsku úrvalsdeildarinnar í gær þegar þeir gerðu sér lítið fyrir og lögðu meistara síðasta árs og efsta lið deildarinnar, Aalborg Håndbold, 30:29, á heimavelli. Álaborgarliðið skoraði tvö síðustu mörkin í leiknum.
Donni skoraði sex mörk í leiknum, átti tvær stoðsendingar og var einu sinni vikið af leikvelli. Hann þótti með bestu mönnum Skanderborgliðsins í leiknum ásamt Emil Lærke og Morten Hempel Jensen.
Þetta var aðeins þriðja tap Aalborg Håndbold í deildinni í vetur. Nú munar aðeins einu stigi á Aalborg Håndbold og GOG þegar hvort lið hefur leikið 20 af 26 leikjum í deildinni. Fredericia HK, undir stjórn Guðmundar Þórðar Guðmundssonar, er í þriðja sæti með 27 stig og á leik til góða gegn Ribe-Esbjerg á heimavelli í dag.
Skanderborg AGF, sem var fimm mörkum yfir í hálfleik í leiknum í gær, 15:11, er í fjórða sæti með 25 stig að loknum 20 leikjum.
Staðan í dönsku úrvalsdeildinni í karlaflokki:
