Dregið verður í riðla HM kvenna í Gautaborg í dag

Ísland verður á meðal nafna 32 þjóða í skálunum þegar dregið verður í riðla á heimsmeistaramóti kvenna í handknattleik í Gautaborg í dag. Keppnin fer í upphafi fram í átta riðlum með fjórum liðum í hverjum riðli. Hafist verður handa við að draga í riðla upp úr klukkan 13.30 í Gautaborg þar sem sænska landsliðið verður með bækistöðvar á mótinu.

Heimsmeistaramótið fer fram í Danmörku, Noregi og Svíþjóð frá 29. nóvember til 17. desember þegar úrslitaleikurinn fer fram í Jyske Bank Boxen í Herning á Jótlandi.

Í riðlakeppni mótsins verður leikið í Gautaborg og Helsingborg í Svíþjóð, í Þrándheimi og Stavangri í Noregi og í Herning og Frederikshavn í Danmörku.

Ísland tekur þátt í annað sinn á heimsmeistaramóti kvenna í handknattleik eftir að hafa fengið annað af tveimur boðsætum sem stjórn Alþjóða handknattleikssambandið hafði yfir að ráða. Austurríki hreppti hitt boðsætið.

Íslenska landsliðið tók þátt í HM 2011 og hafnaði í 12. sæti af 24 þátttökuliðum. Síðan hefur þátttökuliðum HM verið fjölgað um átta.

Liðum þjóðanna 32ja hefur verið raðað niður í fjóra styrkleikaflokka sem dregið verður úr.

Noregur vann til gullverðlauna á heimsmeistaramótinu sem fram fór á Spáni í desember 2021.

Þegar hefur verið raðað niður í nokkra riðla mótsins.