Sveinn Jóhannsson lék í 45 mínútur með danska úrvalsdeildarliðinu Skjern í tveggja marka sigri á útivelli á Skanderborg Aarhus, 30:28. Þetta var fyrsti leikur Sveins í 11 mánuði. Hann meiddist mjög illa á hné á æfingu íslenska landsliðsins hér á landi í upphafi árs, nokkrum dögum áður en haldið var á Evrópumótið sem Ungverjalandi.
Talsvert er um meiðsli í herbúðum Skjern. M.a. er tveir línumenn liðsins á meiðslalistanum. Þar með var nánast ekki undankomu auðið hjá Sveini í gær, sem hefur verið frá keppni vegna meiðsla í liðlega 10 mánuði og farið a.m.k. í tvær aðgerðir. Hann skoraði m.a. tvö mörk í leiknum í gærkvöld.
„Ég lék síðast með SønderjyskE rétt fyrir síðustu jól,“ segir Sveinn í samtali við heimasíðu Skjern. Hann vonast til að vera kominn inn á beinu brautina eftir mjög erfiða mánuði þótt vissulega hafi verið nokkuð bratt að fara úr engu í 45 mínútur. Oft er mælt með að menn byrji hægar í endurkomu eftir langvarandi meiðsli.
Auk meiðslanna þá datt samningur Sveins við þýska liðið Erlangen upp fyrir í sumar þegar ljóst var að batinn eftir meiðslin í janúarbyrjun var hægari en vonir stóðu til. Sveinn hafði samið við Erlangen undir lok síðasta árs og átti að færa sig um set í sumar sem leið eftir þriggja ára veru hjá SønderjyskE á suðurhluta Jótlands. Þegar að ekkert varð af samningnum við Erlangen náðist samkomulag við Skjern á norðurhluta Jótlands. Sveinn samdi við Skjern til eins árs.
