„Ég trúi því ekki að við höfum unnið, að við höfum misst niður átta marka forskot og að Þórey hafi verið svona yfirveguð síðustu sekúndurnar. Þessi titill er uppskera eftir mikla vinnu því við fórum svo ógeðslega erfiða leið,“ sagði Hafdís Renötudóttir markvörður Evrópubikarmeistara Vals þegar handbolti.is hitti hana í sigurgleðinni eftir sigur Vals í Evrópubikarkeppninni í handknattleik kvenna í dag.
„Við eigum þennan sigur svo sannarlega skilinn. Evrópubikarmeistarar. Þetta verður ekki betra,“ sagði Hafdís og lyfti verðlaunapeningnum upp sigrinum til staðfestingar eins og sjá má á myndskeiðinu sem fylgir með.
„Ég er svo þakklát. Vikan fram að leik hefur verið erfið. Ég á eftir að lifa lengi á þessu,“ sagði Hafdís Renötudóttir markvörður Evrópubikarmeistara Vals.
Lengra viðtal er við Hafdísi á meðfylgjandi myndskeiði.
Evrópubikarkeppni kvenna – fréttasíða.
