„Við erum afar spenntar fyrir að takast á við Serba og höfum fulla trú á að geta átt hörkuleik,“ sagði Sunna Jónsdóttir, landsliðskona í handknattleik, í samtali við handbolta.is um væntanlega viðureign Íslands og Serbíu í undankeppni EM sem fram fer í Schenkerhöllinni á Ásvöllum í dag og hefst klukkan 16.
„Okkar markmið er fyrst og síðast að halda áfram á þeirri braut sem við erum komnar inn á við að breyta og bæta okkur leik stig af stigi. Serbneska landsliðið hefur á að skipa þungum og góðum skyttum sem verður gaman að fást við auk öflugs línumanns,“ sagði Sunna sem vafalaust mun bera hitann og þungan af varnarleik íslenska liðsins í leiknum.
Sunna segir að vafalaust geti hraðinn orðið eitt af vopnum íslenska liðsins í leiknum í dag. Hún segir ennfremur að margt sé líkt með serbneska landsliðinu og því slóvenska sem íslenska landsliðið mætti í vor í undankeppni HM. Núverandi landsliðsþjálfari Serbíu, Uros Bregar, var þjálfari landsliðs Slóveníu áður en hann tók við serbneska landsliðinu í vor. „Hann er vafalaust að leggja margt inn í leik Serba sem hann var með hjá Slóvenum,“ segir Sunna.
„Ég hef fulla trú á liðinu okkar og við getum unnið leikinn á mjög góðum degi. Til þess þarf hinsvegar allt að ganga upp hjá okkur gegn þjóðum sem eru ofar en við á styrkleikalistanum.
Það er gaman að leika á heimavelli. Vonandi fjölmennir fólk á viðureignina og styður við bakið á okkur. Ég veit að við getum unnið ef allt gengur upp,” sagði Sunna Jónsdóttir landsliðskona.
Ókeypis aðgangur á leikinn
Viðureign Íslands og Serbíu í 6. riðli undankeppni EM hefst klukkan 16 í Schenkerhöllinni á Ásvöllum. Aðgangur að leiknum er ókeypis þar sem Arionbanki býður landsmönnum á leikinn.
